Das sind miar


Jsabell Frei

Hallo i bin d'Biba. I bin am 13.9.80 gebora und han im Johr 2000 mini Lehr als Dama- und Herracoiffeuse in Wiifelde (TG) abgschlossa. Sit do bini lidaschaftlichi Coiffeuse. Noch dä Lehr hani 4 Johr in Arosa gschafft und zudem di wunderschön Bergwelt gnossa. Sit am 2004 bin in Chur tätig und unterwägs. Mini Markazeicha sind di ständig wechselnda Frisura und Farba. I hans gern chli usgfalla.
Ich freu mi uf dia Herusforderig im neua Gschäft und uf spannendi neui und altbekannti Kundschaft.


Barbara Cadosch

I bin d'Barbara und bin am 27.04.84 gebora. Für mina Bruaf hani mi scho in junga Johra entschida. I han im Johr 2004 d Lehr abgschlossa und jeda Tag macht miar mini Arbet ufs neua Freud. I liaba der Kundakontakt und z kreativa Schaffa. Für mi isches d'Erfüllig, wenni gseh dörf, dass mini Kunda dr Salon mitema Lächla ufem Gsicht verlöhnd. Jeda Mensch isch einzigartig und i möchti dia Einzigartigkeit mitera Frisur, wo abgstumma isch uf da Typ und z'Wesa hervorheba. Egal obs a trendiga Schnitt oder a usgflippti Farb isch. Do sind kei Grenza gsetzt! I freua mi zum eu dörfa in üserem neua Salon bediana.


Daniela Giger

Scho sit Kindergartazita isches min Traum, dr Bruaf als Coiffeuse uszüaba. Dä Traum isch dänn wohr worda, nochdem i dr Abschluss als Dama- und Herracoiffeuse im 2002/2003 erraicht han.
Öpis vom Schönschta in minem Bruaf isch, dass er so vielsitig und kreativ isch. I han sehr viel Spass dra nebem Hoor schnida au verschiedni Flecht- und Ufsteckfrisura z'kreiara. Nebscht däm, dass i mini Tochter als Hoormodell dörf frisiara, isches für mi a lässiga Usglich au für eu Kunda 1-2 Täg in dr Wucha do z'si.


Shanja Panier

I bin d Shanja und bin am 2. Mai 2000 gebora. I han mini Lehr im Summer 2019 im Salon Rita in Chur abgschlossa. Für de Job han ih mi entschieda, weil i liabend gera im kreativa Bereich tätig bin, was au mis Hobby mit grossa Torta und farbiga Cupcakes guat erklärt. Für so Sacha kanns miar nia z farbig oder z usgfalla sii, au wenn ih selber uf da ersti Blick nit aso wirka. Als Küken vu derra lässiga Truppa, freu ih mi sehr drüber in dem Team a Chance kriagt z haa und vieli neui Erfahriga und Ideea sammla z dörfa. Zu mina Liablingsufgabana zellend Hochsteckfrisura für a Hochziit oder au öpis schlichters mitma Zöpfli für as klises Fest.

Ich freua mi uf d Arbet mit eu und uf euri kreativa Wünsch!